KUCHING: Sarawak deka bekunsika penemu enggau menua Eropah pasal pelin sereta perspektif nengeri tu dalam betapi isu ubah gaya hari.
Premier Sarawak, Datuk Patinggi Tan Sri Abang Johari Tun Openg madahka, iya dikangau sida di Eropah nyadi panel forum ti diatur di Poland kena 24 April tu.
"Aku dikangau sida Eropah ti bepalan di Poland, sereta siti topik ti dikunsika kitai iya nya bakani chara Sarawak mutarka penanggul gaya hari.
"Nama ti digaga kitai di Sarawak ditu udah dipeda sida (Eropah), sida matau gerempung dunya sereta nya alai aku dikangau bekunsika penemu (pasal ngatur ubah gaya hari) kelebih agi di menua Eropah," ku iya.
Iya madahka pekara nya maya dirandau raban pengarang berita pengudah ngulu pengerami Nerima Pengabang Aidilfitri ti diatur Sapit Menteri Utiliti enggau Telekomunikasyen, Datuk Dr. Abdul Rahman Junaidi di Taman Gaya, Jalan Sultan Tengah ditu, malam ensanus.
Abang Johari nerangka, kunchi ngagai inisiatif nya, iya nya pemutus ati enggau komitmen perintah Sarawak dalam mantu nguruska isu gaya hari dunya.
"Sechara pukul rata ba taun 2023, pukul rata suhu tauka pengangat serata dunya niki ngagai 1.45 darjah celsius.
"Reti ia, bepelasarka ngagai Sempekat Paris, nyema pukul rata pengangat tu lebih 1.5 darjah celsius ia deka mai penanggul ngagai dunya.
"Tikas peninggi ai tasik deka niki, ais nyadi lela, tasik nyadi angat, ikan enda ulih idup enggau nyema kitai enda mutarka pekara tu enggau manah, ba taun 2024 tauka 2025 nyadi sengkan adan pengidup mensia," ku iya ti mega Menteri Energi enggau Pemeruan Rampa Menua.
Nya alai, asil pengawa Sarawak mutarka penanggul ubah gaya hari diperatika menua Eropah.
"Ketegal kitai udah berengkah nangkap karbon enggau ngena energi gadung hidrogen, sida deka meda perspektif Sarawak. Nya kebuah aku dikangau nyadi panel forum nya," ku iya.
Sama bisi datai ngabang ngagai pengerami nerima pengabang Aidilfitri nya, Sekretari Perintah Sarawak Datuk Amar Mohamad Abu Bakar Marzuki enggau bini iya Datin Amar Baduyah Bujang; enggau Sapit Menteri ba Opis Premier Sarawak (Undang-Undang, MA63 enggau Kaul Nengeri -Perintah Besai) Datuk Sharifah Hasidah Sayeed Aman Gahazli.