KUCHING: Perintah Sarawak begunaka sanding penemu ari orang ti landik enggau pandai bekaul betapi enggau impak ari Gunung Ruang, Indonesia ti meletup ke dipelaba ulih ngeruga kandang angin di nengeri tu.
Premier Sarawak, Datuk Patinggi Tan Sri Abang Johari Tun Openg madahka, nya berindik ari impak asap ketegal gunung nya meletup ti ulih meri empas kelebih agi ngagai sektor penerebai di Sarawak.
Taja pia ku iya, bisi atur dipejalaika dulu nyema asap abu gunung nya tama ngagai kandang angin ba sekeda bagi menua di nengeri tu.
"Diatu, Kota Kinabalu udah kena impak laban kitai meda kini tunga angin bepuput.
"Aku pan enda ulih meri penerang pasal pekara nya, enti ia nyadi baru kitai nemu, tang kitai meda dulu bakani sereta nganti sanding penemu ari orang ti landik enggau pandai," ku iya.
Iya madahka pekara nya maya dirandau pengarang berita pengudah datai ngagai pengerami Nerima Pengabang Hari Raya Aidilfitri ti diatur Sapit Menteri Utiliti enggau Telekomunikasyen, Datuk Dr. Abdul Rahman Junaidi di Taman Gaya, Jalan Sultan Tengah di sini, malam ensanus.
Terang iya, empas ari gunung nya ti meletup udah ngeruga penama enggau pemansut dalam sektor penerebai di Sarawak.
"Kebendar kitai irauka zarah ari ke meletup nya, nya alai bilun kitai enda dikemendarka terebai ketegal zarah nya," ku iya.
Dulu ari nya, Opis Meteorologi Malaysia (MetMalaysia) dalam penerang madahka dipelaba asap ari Gunung Ruang ti meletup di Sulawesi Utara nya tama ngagai sekeda endur kandang angin Sarawak dibai angin.