Bantu nya diberi nengah JKM ti bisi agih belanja kena mantu ruang bilik tauka orang ti betapi penusah besai baka kena serang jelu siga
"Enti iya (indai tuai ti kena penusah besai) udah ditemu (diserang jelu siga), endang bisi bantu diberi ungkup iya ti kena penusah diempa jelu siga."
Dato Sri Nancy Shukri
Menteri Pemansang Indu, Ruang Bilik enggau Komuniti
KUCHING: Perintah seruran mantu rayat ti kena penusah besai nyengkaum ruang bilik tauka orang ti diserang jelu siga.
Menteri Pemansang Indu, Ruang Bilik enggau Komuniti, Dato Sri Nancy Shukri madahka, bantu nya diberi nengah Opis Pengelantang Pendiau Komuniti (JKM) ti bisi agih belanja ungkup tuju nya.
Nya alai ku iya, nya nyengkaum ruang bilik tauka indai tuai ti diripotka lenyau dipelaba ketegal diempa baya di Sungai Rayu, Lundu apin lama.
"Enti iya (indai tuai ti kena penusah besai) udah ditemu (diserang jelu siga), endang bisi bantu diberi ungkup iya ti kena penusah diempa jelu siga.
"Bantu tu ari baruh JKM, ti endang bisi agih belanja ungkup pekara ti baka nya.
"Sehari tu kitai nyuaka bantu sechara 'ad-hoc' aja ngagai sida (sebilik enggau kena penusah) dikena meli utai diempa enggau diirup," ku iya.
Iya madahka pekara nya maya dirandau raban pengarang berita pengudah ngambi bagi ngabas kandang endur pengawa ngiga enggau nyelamat (SAR) indai tuai ti diripotka lenyau dipelabaka diempa baya di Sungai Rayu, Lundu, kemari.
Nancy madahka, operasyen SAR indai tuai nya agi dipejalaika, sereta raban SAR dipelaba deka tama ngagai anak sungai mit ti engka nyadi sarang baya.
"Tang naka kediatu, ai agi surut sereta anak sungai mit nya agi rangkai endar sereta sida ti bekaul enda diperansang tama kia nyentuk ai pasang.
"Nama ti pemadu beguna, kitai besampi sereta bebendar ngiga iya sereta ngarapka ditemu enggau lengkas," ku iya.
Berindik ari pekara nya, Nancy ti mega Kaban Parlimen Santubong minta peranak ti ukai semina ba kandang menua nya, tang mega ba endur bukai ti bisi potensyel bisi baya ngambika lebih ngadang sereta bejimat.
Ku iya, bisi sungai endang alai peranak beridup begiga rejeki baka lokan, tang bisi maya pekara enda disadang deka nyadi.
"Nya alai, aram kitai sama ngingatka pangan diri ngambika lebih bejimat," ku iya.
Kena Hari Tiga, siku indai tuai diripotka lenyau dipelaba ketegal diempa baya di Sungai Rayu, Lundu.
Pengari bejaku ari Pusat Gerakan Operasi,Opis Bomba enggau Penyelamat Malaysia (JBPM) Sarawak madahka, sida iya nerima ripot bekaul enggau penusah nya pukul 1.55 lemai.
Nitihka iya, raban ari Balai Bomba enggau Penyelamat (BBP) Petra Jaya dipinta ngelawa endur penusah nya nyadi lalu bejalaika operasyen SAR.
"Indai tuai nya begulai enggau siku agi sida sebilik ngagai kandang endur Sungai Rayu ngiga lokan urung pukul 8 pagi.
"Nitihka saksi (sida sebilik), dipelabaka indai tuai nya udah diempa baya laban bisi bekau darah enggau bekau kaki bisi ditemu," ku iya.