BINTULU: Peranak ti tasah kena penusah angus ba Pasar Tubau enggau Rumah Chaong Jampang, Sungai Sedaun nerima bantu tumu RM41,000 ari Kaban Kunsil Negeri Murum Kennedy Chukpai Ugon.
Ku iya, bisi 31 iku Ketuai Ruang Bilik (KIR) Pasar Tubau nerima bantu sepenyampau RM31,000 lalu 11 KIR Rumah Chaong nerima bantu RM11,000.
“Tu bantu ngenyit diberi ngagai semua KIR ti tasah ketegal penusah angus ti nyadi kena 3 enggau 4 Ogos tu tadi dikena ngelempungka tating penusah semua sida,” ku iya lebuh ke ngabas ngagai palan penusah nya ke nyadi dalam sitak DUN Murum, ensanus.
Ngena bantu nya, sida ke tasah nya tau meli barang ke diguna sekumbang ke nganti bantu bukai.
Iya meri terima kasih ngagai Komiti Mutarka Penusah Ngenyit Bagi Menua Bintulu enggau Opis Pelilih Menua Sebauh nyengkaum Opis Residen Bagi Menua Bintulu, Angkatan Pertahanan Awam Malaysia (APM) Bintulu, Opis Bomba enggau Penyah Penusah Bintulu, Opis Pengintu Pengelantang Pendiau Raban Bansa Negeri Sarawak, Polis Diraja Malaysia (PDRM) Tubau enggau semua ti lempung jari meri bantu ngagai sida ke tasah kena penusah angus di Pasar Tubau enggau Rumah Chaong.
Sama bisi enggau lebuh ke ngabsa sereta nyuaka bantu nya, Penghulu Joshua William, Tuai Rumah Lichong Along enggau kaban Jelalong Tubau Action Committee (JTAC).