Dikena nentuka pengelantang rayat Sarawak seruran dikemerat enggau setipak lalu ulih diangkat ninting taun
"Dalam ripot tumu ti diterima, kitai dipadahka iya nya pengelantang rama dalam komuniti Sarawak dipeda bisi nambah dibandingka enggau taun 2019.
Dato Sri Fatimah Abdullah
Menteri Pemansang Orang Indu, Nembiak Mit enggau Pengelantang Komuniti (KPWK)
KUCHING: Perintah Sarawak bebendar dalam ngenegapka pengawa mansik indeks pengelantang rama di nengeri tu, ku Menteri Pemansang Orang Indu, Nembiak Mit enggau Pengelantang Komuniti (KPWK) Dato Sri Fatimah Abdullah.
Ku iya madah, tu dikena nentuka pengelantang rayat Sarawak seruran dikemerat enggau setipak lalu ulih diangkat ninting taun.
Nitih ku iya KPWK udah nyain sempekat (MoA) begulai enggau Swinburne Sarawak Sdn Bhd lalu minta sida bejalaika pansik indeks pengelantang rama ungkup Sarawak.
"Dalam ripot tumu ti diterima, kitai dipadahka iya nya pengelantang rama dalam komuniti Sarawak dipeda bisi nambah dibandingka enggau taun 2019.
"Lalu penambah ti baka tu mih ti deka dijapai nama agi nyadi pekara ti beguna dalam nyukat empas aspirasyen bungkur rama ari baruh Strategi Pemansang Pengudah COVID-19 (PCDS) 2030," ku iya.
Iya madah munyi tu lebuh ti bejaku maya pengerami bejadi Kembara Perpaduan Program Rumah Terbuka Aidilfitri enggau Food Unites Sarawak 2024 Beserimbai enggau Ngintu Minggu Penyerakup ditu, kena malam Hari Minggu.
Besrindik ari tu, Fatimah madahka pengandal ati meda ejensi ngintu pengelantang pendiau sekalika gerempung ukai dikuasa perintah (NGO), peribit tauka ejensi korporat ngatur mayuh program ngintu pengelantang ti meri pemaik ngagai komuniti pupu bansa kelebih agi raban ti seranta di Sarawak.
"Nya alai, aku minta ngambika ransing dalam mantu sida ti begunaka nya enda ngira bansa enggau jalai pengarap baka tu ti patut kitai kemeran.
"Laban nama ti digaga kitai, iya nya meri ngagai ekosistem ti deka nyungkak bungkur rama di Sarawak," ku iya.
Bekaul enggau pengerami Kembara Perpaduan tu, Fatimah pechaya tu ulih nyungkak pengeransing beserakup lalu ulih nyeliahka konflik dalam komuniti pupu bansa, jalai pengarap enggau budaya.
"Aku dipadahka Ngintu Minggu Penyerakup Taun 2024 Renggat Nasional deka diatur ba Angsana Johor Bahru Mall, Johor Darul Takzim kena 23 nyentuk 27 Mei 2024 ila," ku iya.
Lalu Sarawak ku iya nambah, iya nya palan kedua pengudah Sabah ngatur Kembara Perpaduan Food Unites Beserimbai Ngintu Minggu Penyerakup Taun 2024.
"Nya alai, nama ti diarapka aku nyadi Menteri ti nyaga penyerakup di Sarawak ngambika program tu ulih terus nyaga pemanah ti udah dijapai kitai ngelama tu.
"Pia mega bida enggau konsep nerima tu mih ti ngenegapka kaul penyerakup lalu nyadika Malaysia menua ti chukup nyelai enggau manah ba mata dunya," ku iya.
Sama datai, Ketuai Sekretari Opis Menteri Penyerakup Menua Datuk Azman Mohd Yusof, begulai enggau temuai dipebasa ke bukai.