SIBU: Bisi 1o iku indu dara deka berebutka gelar Kumang Karnival Kebudayaan Durin 2024 ti diatur di Pekan Durin ditu, malam 28 April tu.
Kelimpah ari dipasuk indu dara menua tu, pekit tu mega udah matak sida ari luar Sibu baka Kuching, Song, Kanowit enggau Betong.
Sida 10 iku indu dara nya nyengkaum Audrey Amara Bachok, 23, dari Kuching, Astina Anabella Augustine, 21, (Song), Vanessa Grace Tali, 19, (Kanowit), Tifanny, 22 (Sibu), Clarissa Rinya Setian, 20 (Sibu), Floveena Debra Ningkan, 23 (Betong), Nicolyn Kimberly Raymond, 17, (Sibu), Ranisha Ismail, 21, (Sibu), Diyamirza Nantai David, 22, (Kanowit) enggau Easter Jawai Paul, 27, (Betong).
Gelar kumang deka mai pulai perais mata duit RM5,000 sereta piala, makota, selampai, bungai enggau setipikit penyereta; lumur dua nerima RM3,000 sereta piala, makota, selampai, bungai enggau setipikit penyereta.
Lumur tiga deka mai pulai mata duit RM1,500 sereta piala, makota, selampai, bungai enggau setipikit penyereta
Sida ti masuk pekit tu deka ngena Ngepan Iban ti nyadi rambai jaku.
Pekit ti diatur nyerumba pengawa nutup Karnival Kebudayaan Durin 2024 nya dipelaba deka dipenyadi Menteri Dagang Temuai, Industri Kreatif enggau Seni Pemerindang, Dato Sri Abdul Karim Rahman Hamzah, urung pukul 7 malam.