Nya kebuah perintah nengeri numbuhka MEITD nyadi entara mutarka isu suntuk pengajar, isu fasiliti baka sekula balat jai
"Nya alai ba renggat nengeri, Perintah Sarawak udah numbuhka MEITD ti deka nyadi entara ba pengawa mutarka isu pelajar di Sarawak."
Dato Sri Fadillah Yusof
Sapit Menteri Besai Malaysia
KUCHING: Perintah Sarawak meda bidang pelajar nyadi siti bidang pemadu dikemerat ti beguna.
Diambi jaku ari Unit Komunikasi Awam Sarawak (UKAS) Sapit Menteri Besai Malaysia Dato Sri Fadillah Yusof madahka, berindik ari pekara nya perintah nengeri udah numbuhka Opis Menteri Pelajar, Inovasyen enggau Pemansang Penau Sarawak (MEITD).
Ku iya, nya nyadi entara enggau Opis Menteri Pelajar Malaysia (KPM) kena betapi tauka mutarka isu pelajar di Sarawak.
"Nya alai ba renggat nengeri, Perintah Sarawak udah numbuhka MEITD ti deka nyadi entara ba pengawa mutarka isu pelajar di Sarawak.
"Penguji besai ti patut ditapi sechara begulai entara perintah besai enggau perintah Sarawak dalam bidang pelajar diatu iya nya isu suntuk pengajar enggau isu fasiliti baka sekula balat jai.
"Nya kebuah, pelajar nyadi penguji besai ba kitai enggau nyadi siti agenda beguna dalam MA63.
"Meri kuasa atur perintah dalam sektor pelajar nyadi fokus besai enggau perintah besai nengah Sekretariat Sempekat Malaysia 1963 (MA63)," ku iya.
Iya madahka pekara nya lebuh bejaku ba pengerami Ramah Tamah Aidilfitri Yayasan Sarawak di sebuah hotel tebilang di Kuala Lumpur, kena Hari Empat.
Fadillah bejaku baru madahka, Sabah enggau Sarawak betapi penguji dalam sektor pelajar laban langgur tauka sadang penemu bekaul enggau sektor nya dipejalaika di Putrajaya kelebih agi isu ngambi enggau nganjung gawa pengajar di Sarawak.
"Tebal agi ke puang nya diisi chalun ti enggau gawa di Sarawak ketegal ngerunding di kandang menua ulu, ngujungka nadai pegawai gawa di Sarawak.
"Dalam pekara tu, dalam konteks kuasa atur perintah dalam pelajar diberi ngagai kitai sereta kitai deka nentuka ngambika penuduk puang nya ulih diisi, enggau chalun ulih gawa di Sarawak," ku iya.
Baka ti dipadah, bisi 110 iku nembiah Sarawak ari baruh Program Pertukaran Pelajar Yayasan Sarawak ngulu pengerami nya.
Berebak enggau tu, Yayasan Sarawak udah nyain Sempekat Pemereti Ati (MoU) enggau Opis Menteri Pelajar Malaysia enggau MLNG Petronas ti deka ngenegapka agi Program Pertukaran Pelajar Yayasan Sarawak tu.
Sama bisi datai, Menteri Pelajar, Fadhlina Sidek; Sapit Menteri ba Opis Premier Sarawak (Pekara Korporat, Pemadah & UKAS), Datuk Abdullah Saidol enggau Direktor Yayasan Sarawak, Mersal Abang Rosli.