BINTULU: Atur nerima pengabang maya pengerami besai ti digulu pupu raban bansa iya nya pengerami ngena konsep ati manah tauka mentas ti ulih nanggam rat kaul entara semua raban bansa di menua tu.
Menteri Dagang Temuai, Seni enggau Budaya, Datuk Seri Tiong King Sing madahka, endang udah nyadi asal ba raban bansa di menua tu ngaga konsep nerima pengabang laban nya bisi pengelebih tauka penyelai ke diri empu dalam ngerami pupu raban bansa ke bisi.
Ku iya, ukai semina maya Hari Raya Aidilfitri, tang mega kitai sama nyambut pengerami Taun Baru China, Deepavali enggau Krismas ti dipeda enggau nyata ulih ngenegapka agi runding penyerakup pupu raban bansa.
"Aku temegah ati laban peranak genturung pendiau ditu sama ulih ngerami pengerami tu," ku Kaban Parlimen Bintulu ti mega Kaban kunsil Nengeri (ADUN) Dudong, dalam teks jaku iya ti dibacha Pegawai Khas iya Azman Abdul Rahman ba Majlis Jejak Harmoni Di Aidilfitri 2024 di Balai Raya Kampung Assyakirin Fasa 1 ditu, malam kemari.
Pengerami nya diatur Komiti Pemansang enggau Pengelikun Genturung Pendiau (JKKK), Kawasan Rukun Tetangga (KRT), Pendidikan Kesejahteraan Keluarga (PKK), Opis Pemansang Komuniti (KEMAS), Gerakan Belia Kampung Assyakirin Fasa 1 enggau Parti Pesaka Bumiputera Bersatu (PBB) Tanjong Batu.
Tiong madahka, taja pan pengerami Aidilfitri nyau deka datai ba pengujung tang nya enda nagang semua pupu raban bansa berami begulai enggau ati manah tauka mentas.
Kelimpah ari nya, Chairman Pengatur pengerami ti mega Tuai Bansa Komuniti Kampung Assyakirin Fasa 1, Pengiran Hamdan Pengiran Kerta madahka, sida iya temegah ati laban ulih ngatur pengerami nya pengudah pandemik COVID-19.
Ku iya, tuju pengerami nya diatur ngambika peranak genturung pendiau ulih ngelawa sereta begulai enggau pangan diri seraya ngerapitka agi kaul.
"Kitai temegah ati ngagai komitmen komiti pengatur ti bekerejasama ngemujurka pengerami tu, baka sempama lempung sama nanggung, berat sama ngangkat," ku iya.
Nambah nya iya madahka, pengerami nya diatur dikena meri awak ngagai peranak ari luar bagi menua tu ulih sama berami laban sebedau tu ba hari keterubah Raya sida pulai ke menua diri.
Berebak enggau tu iya beterima kasih ngagai orang ti bisi mantu enggau meri pemeri kena ngemujurka pengerami nya.
Sama bisi datai ADUN Jepak, Iskandar Turkee; Sapit Chairman JKKK Kampung Assyakirin Fasa 1 Yusuff Ali; Chairman KRT Kampung Assyakirin Fasa 1, Mohamad Sahari; Pegawai Tadbir Sarawak Ali Hikmatullah Khan Ali Sabri ngarika pegawai pelilih menua Bintulu; Sapit Tuai PBB Tanjong Batu, Sophie Shariee; Exco Raban Nembiak PBB ti mega Tuai Raban NembiakPBB Tanjong Batu Lyokarto Sikong; sereta bala tuai raban bansa.