KUCHING: Perintah Sarawak deka bejalaika Operasyen Begulai Rabies 2024 di Pelilih Menua Kuching kena 29 ngagai 30 April enggau 2 ngagai 3 Mei tu kena nagang epidemik rabies berampit.
Komiti Mutarka Penusah Ngenyit Nengeri Sarawak (JPBNS) dalam penerang berita kemari madahka tuju operasyen nya kena meri penyedar ngagai mensia mayuh enggau nerangka kebuah meri lisin ngagai jelu tupi.
Ku JPBNS, Operasyen nya deka meresa ari rumah ke rumah iya nya pengawa meri vaksin ngagai ukui, enggau lisin ba kandang genturung pendiau ti ngerikutka kes rabies pemadu tinggi bekaul enggau mensia, iya nya di Tabuan Jaya, Taman Landeh, Desa Wira enggau Sungai Maong Tengah.
Berindik ari pekara nya ku JPBNS, raban bansa enggau pengempu ukui dipinta meri kerejasama maya operasyen meri vaksin, meri lisin dipejalaika sereta enda ngelakka jelu tupi lepas di luar kompaun rumah.
Kerejasama semua orang amat beguna dikena nentuka operasyen tu ulih mujur dipejalaika awakka ulih nagang epidemik rabies ari berampit, sereta Sarawak ulih tejapaika status nadai rabies lebuh manggai 2030.
Ejensi ti ngambi bagi ba operasyen tu nyengkaum Opis Pengerai Nengeri sarawak, Opis Veterinar Sarawak, Polis Diraja Malaysia, Angkatan Pertahanan Malaysia, Unit Penerit Undang-Undang enggau Pengelikun Sarawak, Majlis Bandaraya Kuching Selatan, Dewan Bandaraya Kuching Utara, Majlis Perbandaran Padawan enggau gerempung ukai dikuasa perintah ti bekaul.
Naka 19 April 2024 bisi lima bagi menua di Sarawak ditetapka nyadi kandang endur rabies iya nya Kuching, Samarahan, Serian, Bintulu enggau Sri Aman.
Kenyau ari taun 2017, bisi 213,190 iku ukui udah divaksin, enggau 78 kes rabies bekaul enggau mensia udah diripotka lalu ari penyampau nya 71 kes pemati.