MARUDI: Penyampat pemansang teknologi nyadi penguji ngagai raban pengajar ba pengawa nempa mudal mensia ti bisi kualiti setipak enggau pemansang sehari tu.
Sapit Menteri Pengerai Mensia Mayuh, Pengawa Berumah enggau Perintah Lokal, Datuk Dr. Penguang Manggil madahka, nya alai raban pengajar patut nyikap diri ngena penemu teknologi pemadah enggau komunikasyen (ICT) kena betapi penguji Industri Revolusyen (IR) 4.0.
"Tanggung pengawa pelajar sehari tu udah berubah enggau nyata, sereta nya kebuah raban pengajar patut nyikap diri ngena ICT kena betapi penguji IR 4.0," ku iya.
Penguang madahka pekara nya dalam teks jaku iya ti dibacha Pegawai Pelilih Menua Marudi Rose Edward Tarang ba 'Majlis Anugerah Kecemerlangan Sekolah Mengah Kebangsaan (SMK) Marudi ditu, kemari.
Berebak enggau tu Penguang madahka, apai indai patut sama bisi bejalaika tanggung pengawa dalam nentuka pemujur enggau kuing anak diri.
Ku iya, apai indai patut chakah matau pemansang anak sereta enda nyerahka semua tanggung pengawa ngagai sekula aja.
"Beri sukung tegap ngagai sekula ngena chara masuk semua program ti udah dilanggur enggau diatur sekula," ku iya.
Bekaul enggau pekara nya, Pengudang deka ke Gerempung Apai Indai enggau Pengajar (PIBG) regas dalam bekerejasama kena nentuka juluk nya mujur dijapai.
"PIBG patut regas tauka aktif awakka juluk ngansak anak ba pekara pelajar mujur.
"Iring tauka ajar nanak ngena chara jalai pengara di rumah laban nya pugu penegap," ku iya.
Ba pengerami nya, bisi RM15,000 geram projek mit menua pesisir (MRP) ari Penguang diberi ngagai SMK Marudi.
Sama bisi datai Prinsipal SMK Marudi Mohd Effendi Panglima, Yang Dipertua PIBG Blalang Atom, Pemanca Randi Bundan, Penghulu Jimbau Ena enggau Penghulu Philip Dagang.
Ba pengerami nya, gelar nembiak pemadu nyulut diterima Rozeys Emanuel, Lio Shuang Ying Lionel Lihan Pelit enggau Roliz Robin.