BINTULU: Penyangkai Kapal Bintulu deka diatur sereta dimajuka nitih gaya enggau aspirasyen sistem urus penyangkai kapal di Sarawak, ku Sapit Menteri Pengangkut Malaysia Datuk Hasbi Habibollah.
Nitihka iya, pengudah penyangkai kapal tu diambi sereta dikeempu enggau diatur penuh perintah Sarawak, ia deka nyadi penyangkai kapal versyen Sarawak ti moden enggau manah agi di wilayah tu.
"Singkang Sarawak betul amat iya nya nempa Penyangkai Kapal Bintulu nyadi sebuah penyangkai kapal betikas antarabansa sekali enggau meri penumbuh positif ngagai sektor ekonomi di Sarawak," ku iya.
Iya madahka pekara nya maya bejaku ba pengerami Nerima Pengabang Aidilfitri 2024 diatur Autoriti Penyangkai Kapal Bintulu (BPA) di kompaun Menara Kidurong di Jalan Tanjung Kidurong malam ensanus.
Pekara ti pemadu beguna ku Hasbi, iya nya BPA patut ngetanka kerejasama manah enggau Bintulu Port Holdings Berhad (BPHB) ti diberi lisin ngatur pekara import - eksport penyangkai kapal.
Dalam timpuh ti sama ku iya, sida ti ngurus penyangkai kapal patut nentuka kaul manah entara penguna kelebih agi kompeni industri enggau pemegai entaruh bukai patut chakah agi dikena nentuka sama bulih penguntung sekalika ti meri tauka bulih servis seraya terus nempa 'win-win situation'.
Kelimpah ari nya, Hasbi ngarapka pengerami baka nerima pengabang nya deka ulih nanggamka agi kaul BPA enggau semua pemegai entaruh ti ngena servis penyangkai kapal ba pekara mai tama pansut barang tauka produk sida.
"Nya alai pengawa ngambi sereta ngempu BPA ari perintah besai endang betul maya ia laban perintah Sarawak bisi pengulih ngurus manah agi penyangkai kapal tasik dalam tu," ku iya.
Ba pengerami tu mega iya bisi meri pemeri ngagai 61 iku anak patu ti dikangau khas sama enggau ngerami Aidilfitri nya.
Sama bisi datai Chairman Lembaga Pengarah BPA Dato Sharkawi Alis, Tuai Pegawai Eksekutif BPSB Ruslan Abdul Ghani enggau Manijar Besai LPB Mizool Amir Mat Drus.