SARATOK: Ngemeratka ngagai pemansang dalam pekara pelajar di renggat sekula primari endang beguna ungkup pemansang siku nembiak sekula.
Kaban Kunsil Nengeri (ADUN) Krian Friday Belik madah, dalam pelajar di renggat primari tu, bala nembiak udah dibantaika enggau sekeda skop besai pelajar.
“Dalam pelajar tiga elemen ke dikemerat iya nya Macha, Nulis enggau Ngira tauka dikumbai orang 3M.
“Penemu pemun bekaul enggau 3M tu endang beguna sebedau bala nembiak tu nguasa skop pelajar ke bukai.
“Berindik ari tu, kitai ngarapka semua raban ulih meri komitmen ngagai pekara tu ngambika juluk dalam nentuka juluk perintah nyadi nyata dalam ngadaka modal mensia ti mujur jemah ila,” ku Friday.
Iya madah munyi tu maya Program Pengerami Sekula Jalai Awik di Sekula Primari (SK) Nanga Atoi, ditu kemari.
Nitih ku Friday, iya endang bebendar bekaul enggau pekara pemansang elajar kelebih agi bala nembiak di kandang menua pesisir.
Ku iya, pemansang dalam pekara pelajar endang beguna dalam nentuka pemujur jemah ila raban tu ulih dijamin enggau manah.
“Kerejasama entara komuniti kelebih agi apai indai enggau ketuai komuniti endang patut bisi dalam nentuka tikas pengasi sistem pelajar menua.
“Kaul enggau kerejasama ti manah entara raban sekula enggau komuniti ulih nyadi penyungkak ngagai pemansang sekula sekalika ari sukut fizikal tauka akademik,” ku Friday nerang agi.
Ba pengerami tu mega, Friday udah madahka deka meri agih belanja projek Program Transformasyen Menua Pesisir (RTP) sepenyampau RM200,000 lalu geran projek mit menua pesisir (MRP) sepenyampau RM10,000 ungkup sekula sereta ungkup Gerempung Apai Indai enggau Pengajar (PIBG) di SK Nanga Atoi
Sama bisi datai iya nya Penghulu Loya Seman, Kepala Pengajar SK Nanga Atoi Mohammad Isa Johari, Chairman (YDP) PIBG SK Nanga Atoi Sylvester Saimon enggau ketuai komuniti di kandang menua tu.