Nengah pengeransing ti meruan dalam landskap semikonduktor jemah ila, diidupka ngena chip kompaun
KUCHING: Premier Sarawak Datuk Patinggi Tan Sri Abang Johari Tun Openg ngarapka Sarawak deka ngasilka satelit kediri enggau pengeransing ti meruan dalam landskap semikonduktor jemah ila.
Ku iya madahdikena nentuka visyen tu nyadi nyata, Sarawak diatu bekerejasama enggau kompeni United Kingdom iya nya Compound Semiconductor Application Catapult (CSA) dalam pengawa ngaga chip.
"Ngarapka jemah ila, Sarawak deka bisi satelit diri empu, diidupka ngena chip kompaun kitai.
"Taja pia dikena nyapai pemujur tu begunaka pengeransing sereta komitmen ti bebendar," ku iya lebuh ti bejaku maya pengerami Pesta Hopoh SeMalaysia 2024 ba sebuah hotel ditu, kena malam Hari Enam.
Sama bisi datai iya nya Sapit Premier Sarawak Datuk Amar Dr Sim Kui Hian; Menteri Dagang Temuai, Seni enggau Dagang Temuai Sarawak Dato Sri Abdul Karim Rahman Hamzah, Menteri Perengka Pengangkut Dato Sri Lee Kim Shin, Presiden Persekutuan Persatuan Hopoh Malaysia Dato Sri Chong Ket enggau Presiden Persatuan Hopoh Sarawak Datu Dr Chai Khin Chung.
Abang Johari madahka Sarawak sedia dalam nyadi keterubah inovasyen semikonduktor enggau revolusyen gaya semikonduktor kompaun.
Nitih ku iya, gaya inovatif tu kelai pemansang ti majak dalam bidang teknologi baru.
"Tu mih ketegal nya lapa kitai ngiga orang ti landik dalam pekara bekaul enggau teknologi semikonduktor.
"Jeman semikonduktor kompaun begunaka pengereja pengawa pakar ti ngembuan pengelandik ke baru," ku iya.
Kena Hari Dua nyin tadi, SMD Semikonduktor Sarawak enggau Compound Semiconductor Catapult nyain sempekat pemerti ati (MoU) di London.
MoU tu kelai sida bekunsi dalam pemansang semikonduktor kompaun ke deka nyungkak inovasyen dalam ngemansangka pemisi chip mikro dalam ngenegapka teknologi baru sereta chara ngena nya.