KUCHING: Indu dara penatai asal ari Kanowit, Hermina Anthony udah bulih gelar Kumang ba Pekit Kumang Siol Kandis 2024.
Iya udah ngalahka lapan iku pemekit bukai dalam pekit pemajik tu ti diatur ba SJK Chung hua No. 3 di Padungan ditu malam kilah ensana.
Hermina, mujur narit ati bala akim enggau pemajik sereta pengelandik ti dibantaika iya, lalu udah mai pulai perais mata duit RM3,000, selampai, trofi enggau bungai.
Penatai asal ari Nanga Gremai di Kanowit, iya diatu benung belajar ngambi Degree in Social Sciences (Development Planning and Management).
Lebuh ti ditanya the Borneo Post, iya madahka semina berengkah enggau pekit pemajik bansa tu ari taun nyin kemari.
“Aku chukup andal ati sereta beterima kasih ngagai Petara laban ti udah menang malam tu (malam kilah ensana),” ku iya nambah.
Beserimbai enggau tu, gelar Lulong udah dipenggi Avinorish Wisstin, 26, ari Kota Samarahan udah mai pulai RM2,000, trofi, enggau bungai.
Angeline Johnatan, 23, penatai asal ari Nanga Maing Kakus di Tatau, udah bulih gelar Selinggar Matahari lalu mai pulai RM1,000, trofi enggau bungai.
Enam iku pemekit bukai udah bulih perais sagu hati ti nerima RM200.
Semua perais ungkup tiga penuduk ti pemadu atas tu udah disuaka Sapit Menteri ba Opis Premier (Undang-Undang, MA63 enggau Kaul Nengeri-Perintah Besai) Datuk sharifah Hasidah Sayeed Aman Ghazali.
Sama bisi datai ba pengerami tu iya nya Sekretari Mendam Sapit Menteri Besai Datuk Seri Fadillah Yusof, Irwan Zulkarnaen Mohd Hasbie enggau chairman pengatur pengerami Jos Jawa.
Pengerami tu udah diatur begulai entara Komiti Pemansang enggau Pengelikun Genturung Pendiau (JKKK) Siol Kandis (Dayak) enggau Gerempung Nasional Dayak Sarawak Pampang Siol Kandis.